Cynnau coelcerthi i ddangos pwysigrwydd amaethyddiaeth i’r economi

Mae mudiad Digon yw Digon wedi cynnau coelcerthi mewn sawl lleoliad o gwmpas Cymru ar drothwy’r etholiad cyffredinol.

Cafodd y prif ddigwyddiad ei gynnal ar fferm Shadog, Pentre-Cwrt, ble mae Gary Howells, un o arweinwyr y mudiad yn ffermio gyda’i deulu.

Cafodd coelcerthi hefyd eu cynnau yn Rhuthin, Pennal ger Machynlleth, Aberystwyth, Aberhonddu a Rhydlewis.

Y nod, medd Mr Howells, oedd dangos pwysigrwydd amaethyddiaeth i’r economi wledig, a’u rhwystredigaeth fel grŵp am y “diffyg pwyslais” gan y pleidiau gwleidyddol ar ddiogelwch bwyd ar drothwy’r bleidlais fawr ddydd Iau.

“Mae hyn yn neges i’r cyhoedd hefyd, nid dim ond i’r gwleidyddion ond i bobl yn y dinasoedd a’r trefi,” ychwanegodd.

“Mae sôn mawr am y cost of living a beth yw cost y bwyd yn y supermarkets.

“Os byddwn yn plannu yr holl goed yma, o ble mae’r bwyd yn mynd i ddod? Fe fydd bwyd yn ddrytach ‘to.”