Cynghorydd Gwynedd yn galw am enwau lleoedd Cymraeg yn unig ar fapiau OS

“Mae’r cyngor hwn yn beirniadu’r arferion hyn, gan eu bod yn cyfrannu’n uniongyrchol at golli enwau Cymraeg, ac felly’n tanseilio ein hiaith, ein hanes a’n hunaniaeth genedlaethol,” meddai Einir Williams.

“Pan fydd yr Arolwg Ordnans yn mabwysiadu enw Saesneg, mae’n ymddangos ar wefannau, arwyddion, cyhoeddiadau, a’r cyfryngau ac o ganlyniad, mae’r enw Cymraeg yn cael ei wthio o’r neilltu.

“Mae hyn yn digwydd hyd yn oed ymhlith siaradwyr Cymraeg ifanc, sy’n aml yn cael eu harwain i gredu mai’r enw Saesneg yw’r enw safonol.

“Dyma sut mae iaith yn cael ei gwanhau, nid mewn un ergyd, ond mewn mil o gamau bach.

“Mae enwau lleoedd Cymraeg yn rhan o’n DNA diwylliannol. Maent yn adrodd hanes y tir, y bobl, y chwedlau, y gwaith, y bywyd. Nid oes gan neb yr hawl i’w dileu na’u disodli.”