Cyflyrau cronig ‘yn rhoi pwysau sylweddol ar y gwasanaeth iechyd’

Mae Angharad Lloyd, o Flaenffos, yn dweud bod cael diagnosis o barlys ymledol, neu MS, yn “ryddhad” ar ôl blynyddoedd o ansicrwydd.

Mae Ms Lloyd ymhlith bron i 50% o oedolion yng Nghymru sy’n byw â chyflwr cronig, gyda nifer yn datblygu mwy nag un salwch ar hyd eu hoes.

Mae hi’n dweud ei bod hi wedi aros dros chwe blynedd am ddiagnosis.

“Ges i ddim byd o’r symptomau mwyaf plain,” meddai.

“Odd e’ just yn mynd yn raddol o un rhan o’r corff i’r llall. O’n i’n torri’r croen cyn bo’ fi’n sylwi bo’ fi’n mynd yn agos i’r croen gyda chyllell, a byddwn i’n llosgi fy llaw cyn i fi sylwi.

“O’n i ar y brinc o gael problemau iechyd meddwl i ddweud y gwir.”

Wedi blynyddoedd o apwyntiadau, fe dderbyniodd hi ddiagnosis MS.