Covid-19: ‘Ofnus gweld tri neu bedwar claf yn marw bob shifft’

Fel meddyg ymgynghorol yn gweithio yn Ysbyty Brenhinol Morgannwg ger Llantrisant – un o’r ysbytai gafodd ei daro waethaf gan Covid-19 – mae atgofion poenus y pandemig yn dal i gael effaith ar Dr Dai Samuel.

“O’n ni’n gweld tri neu bedwar claf yn marw yn ystod shifft,” meddai.

“A dechrau meddwl wedyn ‘pryd ma’ hyn yn mynd i orffen, neu ydy e’n mynd i orffen? A fydd y system yn gallu copio?’

“O’dd e’n deimlad o bryder ac yn deimlad o ofn.”

O ganlyniad, mae’n dadlau fod effaith y cyfnod ar staff wedi bod yn sylweddol.

“Ar y dechre o’dd e’n fine, o’ch chi jyst yn ‘neud e,” meddai.

“Ond yn ystod yr ail don ac yn sicr y drydedd don o’n ni gyd wedi blino.

“O’ch chi’n gweld pobl o’dd yn arfer dod i’r gwaith gyda gwên ar ei wyneb bob dydd yn edrych yn drist neu wedi torri.”