Clydach: Brian Whitelock yn euog o lofruddio Wendy Buckney, 71

Roedd Whitelock wedi cyfaddef dynladdiad Ms Buckney, ond roedd yn gwadu cyhuddiad o lofruddiaeth ar y sail nad oedd yn ei iawn bwyll.

Clywodd y llys fod Wendy Buckney yn talu Whitelock i wneud rhywfaint o waith iddi o amgylch y tŷ, ac er ei bod yn ymwybodol o’i gyfnod yn y carchar, roedd hi’n grediniol fod “pawb yn haeddu ail gyfle”.

Cafodd Whitelock ei gyhuddo o lofruddio dau ddyn – gan gynnwys ei frawd – yn 2000, a chafodd ei ddedfrydu bryd hynny i oes yn y carchar.

Fe ymosododd ar ei ffrind Nicky Morgan yn ei gartref yn Abertawe cyn llosgi’r eiddo. Roedd ei frawd Glen hefyd yn cysgu yno ar y pryd.

Cafwyd Whitelock yn euog o lofruddiaeth a dynladdiad ac fe dreuliodd 18 mlynedd dan glo, cyn cael ei ryddhau yn 2018.

Fe wnaeth yr erlyniad ddadlau bod tebygrwydd rhwng y marwolaethau yn 2000 a llofruddiaeth Ms Buckney, gan ddweud bod “trais eithafol wedi ei ddefnyddio yn y ddau achos”.