Cerddwr mewn cyflwr difrifol ar ôl cael ei daro gan gar ym Môn

Mae cerddwr mewn cyflwr difrifol yn yr ysbyty yn Stoke wedi iddo gael ei daro gan gar ar gyrion Llangefni ar Ynys Môn yn ystod oriau mân bore Sul.

Cafodd Heddlu’r Gogledd eu galw i’r gwrthdrawiad rhwng y cerddwr a char Ford Fusion ar y B4422 yn Rhostrehwfa tua 01:15.

Dywedodd y llu fod y cerddwr wedi cael ei gludo “i ysbyty yng ngogledd Cymru cyn cael ei drosglwyddo i Ysbyty Athrofaol Stoke mewn ambiwlans awyr ar ôl cael anafiadau difrifol”.

Mae’r heddlu yn apelio ar unrhyw dystion i gysylltu â nhw, neu unrhyw ddeunydd fideo allai fod o ddefnydd i’r ymchwiliad.

Dywedodd y Sarjant Daniel Rees o’r Uned Troseddau Ffyrdd: “Hoffem siarad ag unrhyw un a allai fod wedi bod yn teithio ar hyd y B4422 yn Rhostrehwfa o gwmpas yr amser hwn ac a allai fod wedi gweld cerddwr neu sydd â lluniau camera cerbyd.

“Ry’n ni hefyd yn annog unrhyw drigolion lleol a allai fod â lluniau teledu cylch cyfyng i gysylltu â ni.”