‘Cenhedlaeth o blant’ yn gweld effaith toriadau i gyllidebau ysgolion

Fe wnaeth arolwg o 416 o aelodau undeb penaethiaid NAHT Cymru ganfod fod mwy na hanner yn disgwyl diffyg yn y gyllideb yn y flwyddyn academaidd hon – cynnydd sylweddol ers arolwg y llynedd.

Yn ôl yr arweinwyr ysgolion – sy’n bennaf yn dod o’r sector cynradd – maen nhw wedi gorfod torri swyddi athrawon a chynorthwywyr dysgu yn ogystal â’u horiau gwaith.

Dywedodd y rhan fwyaf fod cefnogaeth i ddisgyblion gydag anghenion dysgu ychwanegol yn gost sylweddol, yn ogystal â chyflogau staff a thalu am athrawon cyflenwi.

Yn ôl Laura Doel, Ysgrifennydd Cenedlaethol NAHT Cymru, mae rôl penaethiaid yn newid yn sgil y wasgfa ar gyllidebau.

Mae penaethiaid mewn ardaloedd gwledig fel Powys, Sir Benfro a Sir Gâr, “yn camu yn ôl i mewn i’r ystafell ddosbarth i ddysgu – mae hynny’n golygu nad ydyn nhw’n arwain eu hysgolion.”

“Mae ‘na ysgolion yng Nghaerdydd sy’n diswyddo cynorthwywyr dysgu, ac ry’n ni’n gwybod bod y cynorthwywyr hynny yn hanfodol ar gyfer darparu cefnogaeth i blant gydag anghenion dysgu ychwanegol.

“Does gennym ni mo’r adnoddau bellach i allu darparu hynny i’r plant.”