Caernarfon: Babi wedi’i daro gan eitem a daflwyd gan bobl ifanc

Mae’r heddlu’n ymchwilio ar ôl i fabi mewn coets gael ei daro gan eitem a gafodd ei daflu gan griw o bobl ifanc yng Nghaernarfon.

Dywedodd Heddlu Gogledd Cymru ei bod yn ffodus na chafodd y babi ei anafu, ond mae rhai cerbydau wedi cael eu difrodi mewn digwyddiadau tebyg ger Caer Rufeinig Segontium ar yr A4085.

Yn ôl yr heddlu mae swyddogion wedi adnabod 14 o bobl ifanc rhwng naw a 15 oed maen nhw’n amau o fod yn gyfrifol am daflu eitemau.

Bydd swyddogion yn siarad â theuluoedd y rheiny, meddai’r llu.

Dywedodd PC Jordan Jones o’r Tîm Plismona Cymdogaethau: “Mae’r ymddygiad diweddar yng Nghaernarfon yn cael effaith ddifrifol ar drigolion ac yn rhoi pobl mewn peryg.

“Yn ffodus, ni chafodd y babi ei anafu ond mi allai’r stori fod wedi bod yn wahanol iawn.”