Argyfwng llythrennedd yn ein hysgolion – Beirdd Plant Cymru

Mae yna argyfwng llythrennedd ymysg plant a phobl ifanc Cymru, yn ôl Beirdd Plant Cymru.

Yn ol Siôn Tomos Owen, Bardd Plant Cymru, a Nicola Davies, Children’s Laureate Wales, mae “cwymp dramatig” wedi bod yn lefelau llythrennedd a darllen er pleser ymysg plant oedran ysgol Cymru.

Mewn llythyr agored maen nhw’n galw ar Lywodraeth Cymru am “fuddsoddiad gwirioneddol yn nyfodol ieuenctid y wlad”.

Byddai hyn yn cynnwys creu strategaeth genedlaethol ar gyfer llythrennedd yn y Gymraeg a’r Saesneg, a sicrhau bod llyfrgell ym mhob ysgol.

Mae’r llythyr wedi ei gymeradwyo gan nifer o feirdd sydd wedi ymgymryd â rolau beirdd plant Cymru yn y gorffennol neu wedi gweithio’n agos gyda phlant a phobl ifanc, gan gynnwys Mei Mac, Menna Elfyn, Ceri Wyn Jones, Tudur Dylan Jones, Ifor ap Glyn, Eurig Salisbury, Aneirin Karadog, Anni Llŷn, Casia Wiliam a Nia Morais.

Mae Llywodraeth Cymru wedi cael cais am sylw.