Arestio 6 ar amheuaeth o weithio’n anghyfreithlon mewn bwytai yn y gorllewin

Mae chwech o bobl wedi cael eu harestio ar amheuaeth o weithio’n anghyfreithlon mewn dau fwyty Eidalaidd poblogaidd yn y gorllewin.

Cafodd pedwar eu harestio ym mwyty Florentino’s yng Nghaerfyrddin, a dau arall ym mwyty’r cwmni yn Ninbych-y-pysgod.

Dywedodd y Swyddfa Gartref fod swyddogion gorfodi mewnfudo wedi cynnal yr ymweliadau ar ôl derbyn gwybodaeth.

Yn ôl y Swyddfa Gartref, mae tri o’r chwech eisoes wedi dychwelyd i’w gwledydd cartref ac mae un arall wrthi’n dychwelyd.

O’r ddau arall, mae un wedi’i ryddhau ar fechnïaeth tra bod ymchwiliadau’n parhau, tra bod yr olaf wedi cael ei ryddhau gyda rhybudd.

Mae gwaith nawr yn mynd rhagddo i benderfynu pwy sy’n gyfrifol am gyflogi’r unigolion.

Gall cyflogwyr sy’n torri’r gyfraith wynebu dirwy o hyd at £60,000 am bob gweithiwr, yn ôl y Swyddfa Gartref.