Aberdaugleddau: Cyllell yn yr ysgol ‘er mwyn ei dangos i ffrindiau’

Yn ystod diwrnod cyntaf yr amddiffyn yn llys y Goron Abertawe, fe glywodd y rheithgor fod y bachgen yn hoffi ei athrawes ac wedi dewis Hanes fel pwnc TGAU.

Dywedodd nad oedd ganddo unrhyw deimladau drwg tuag at ei athrawes hanes, Vicki Williams, ac nad oedd unrhyw ddadlau nac anghytuno wedi bod rhwng y ddau.

“Sut roeddech chi’n ei gweld?” gofynnodd ei fargyfreithiwr, Matthew Roberts KC.

“Da. Roedd hi’n neis i mi,” atebodd.

Cafodd y gwasanaethau brys eu galw i Ysgol Gyfun Aberdaugleddau ar 5 Chwefror yn dilyn adroddiadau bod “disgybl oedd ag arf yn ei feddiant wedi ymosod ar athrawes”.

Eisoes, fe glywodd y llys fod y “gyllell cegin” wedi dod o floc cyllyll yng nghartref y bachgen.

Cafodd ei disgrifio fel “y mwyaf o’r cyllyll” gyda llafn y gyllell “o’r pig i’r ddolen” yn mesur wyth modfedd.

Wrth ofyn i’r bachgen pam ei fod wedi mynd â chyllell i’r ysgol, dywedodd y bachgen wrth y rheithgor ei fod ef a’i ffrindiau yn arfer “dod a phethau ar hap” i’r ysgol i weld beth fydden nhw’n gallu dod i’r ysgol heb i neb sylwi.

Dywedodd ei fod wedi mynd â’r gyllell fwyaf oherwydd y gyllell hon oedd y “mwyaf trawiadol” i ddangos i’w ffrindiau, ac nad oedd unrhyw fwriad ganddo i’w defnyddio mewn modd dreisgar.

Aeth ymlaen i ddweud nad oedd wedi dangos y gyllell i’w ffrindiau ar y 5 Chwefror gan nad oedd ei ffrindiau i gyd yn yr ysgol y diwrnod hwnnw.

Dywedodd ei fod eisiau dangos “i’r grŵp cyfan” yr un pryd.

Mae’r achos yn parhau.