‘Cost canser yn bwysau mawr’ – teuluoedd yn gofyn am gostau teithio

Cafodd Daisy, 18 oed o Ynys Môn, ddiagnosis o Hodgkin lymphoma cam dau pan oedd yn 17.

“Roedd o just fel bom ar fy mywyd i,” meddai.

“O’n i’n gwneud pob dim trwy’r wythnos – mynd i’r gampfa, mynd i’r ysgol, mynd i glwb ffermwyr ifanc – pob dim. Ac wedyn oedd o just fel bod popeth wedi stopio.”

Ar ôl profi poen yn ei hasennau am wythnosau a sawl ymweliad â meddygon, dim ond ar ôl sganiau a biopsi ddaeth y diagnosis.

“O’n i just ‘efo poen yn fy ribs ac o’n i’n meddwl bo’ fi wedi gwneud rhywbeth yn y gampfa, ond oedd o ddim yn mynd ac oedd o wedi bod dros dair wythnos.

“So ‘nes i fynd at y meddyg teulu a ‘na’th o ddweud bo’ fi wedi gwneud rhywbeth yn y gampfa.”

Dim ond ar ôl i’w chyflwr waethygu y cafodd ei hanfon am brofion pellach.

“Nes i orffen fyny yn A&E ‘efo’r inflammatory markers i fyny, pob dim i fyny, a ‘nathon nhw fyth gael rheswm am beth oedd yn digwydd.

“Wedyn, ‘nathon nhw ffeindio lwmp bach yn fy ngwddf i… nathon nhw fy ngyrru i gael biopsi ac wedyn ffeindio allan bo’ fi ‘efo canser.”