‘Alle ni ddim fforddio gadael’ Spotify ac ‘maen nhw’n gwbod hwnna’

Wrth gyfeirio at Spotify Wrapped dywedodd Mr David ei fod yn teimlo’n “rhwystredig sut mae’n annog cystadleuaeth o fewn cerddoriaeth”.

“Chi’n gweld ffans yn dweud, ‘dwi ‘di gwrando ar y band yma am 20,000 o funudau’, ‘ond dwi ‘di gwrando arnyn nhw am 21,000 o funudau, fi sy’n ennill’.

“Dim cystadleuaeth yw cerddoriaeth a dylai byth fod yn gystadleuaeth.

“Mae’r ffaith ei fod e’n gwneud i ffans cerddoriaeth, rhai ifanc yn bennaf, deimlo fel bod e’n gystadleuaeth yn wirioneddol hurt ac yn niweidiol i fwynhad pobl o gerddoriaeth.”

Dydy Mr David ddim yn hoffi sut mae Spotify Wrapped yn effeithio ar artistiaid chwaith, meddai, “a sut mae’n gosod artistiaid yn erbyn ei gilydd”.

“Chi’n gweld ystadegau pobl eraill – faint o ffrydiau neu faint o wrandawyr maen nhw’n cael y mis, neu faint o wahanol wledydd sy’n gwrando ar eu cerddoriaeth – mae’n gwneud i artistiaid deimlo fel, ‘o, dydyn ni ddim yn gwneud cystal â bandiau eraill’.”

Ond dywedodd fod “artistiaid mewn sefyllfa anodd” oherwydd fe allai Spotify Wrapped fod yn adnodd marchnata da “ond ar yr un pryd chi’n gwneud gwaith hysbysebu am ddim i gwmni biliwnydd sy’n talu ceiniogau i chi”.