Ysgrifennydd Cymru’n cefnogi Vaughan Gething ‘yn llwyr’

Dywedodd Jo Stevens, a ddaeth yn Ysgrifennydd Gwladol benywaidd cyntaf Cymru pan gafodd ei phenodi gan Syr Keir Starmer ddydd Gwener, mae’r grŵp Llafur yn y Senedd wedi cefnogi Mr Gething ac mae e ei hun yn canolbwyntio ar ei waith.

“Mae gan Vaughan fy nghefnogaeth lwyr fel prif weinidog – rwy’n meddwl ei fod yn gwneud job ardderchog,” dywedodd wrth raglen BBC Politics Wales.

“Fe fydd yn cario ymlaen i wneud job ardderchog, ac rwy’ wir yn edrych ymlaen at gydweithio gydag e.”

Roedd Ms Stevens yn canmol y ffordd y darodd y prif weididog gytundeb i roi terfyn ar streiciau meddygon yng Nghymru, yr adolygiad i’r ddeddf yn gostwng terfynau cyflymer i 20mya a’r ymgynghoriad dros gynlluniau amaeth dadleuol.

Yn ystod ymgyrch yr etholiad cyffredinol, fe addawodd y Blaid Lafur i weithio gyda’r llywodraeth ddatganoledig yng Nghaerdydd i leihau rhestrau aros GIG Cymru.

Mewn ymateb i gwestiwn a fuasai’n hoffi gweld mwy o wasanaethau iechyd tebyg i’w gilydd yng Nghymru a Lloegr, atebodd: “Gobeithio.”

Ychwanegodd: “Rwy’n credu’n gryf os ydy pobl yn gwneud pethau’n dda yn unrhyw ran o’r DU dyliwn ni ddysgu o hynny, dyliwn ni rannu’r gwersi hynny.”