Ysgol Dyffryn Aman: Arestio bachgen 14 oed ar amheuaeth o fygwth lladd

Mae bachgen 14 oed wedi cael ei arestio ar amheuaeth o fygwth lladd yn dilyn adroddiadau am negeseuon a anfonwyd dros y cyfryngau cymdeithasol.

Dywedodd Heddlu Dyfed Powys eu bod wedi gweithredu i ddiogelu disgyblion yn Ysgol Dyffryn Aman, Rhydaman ar ôl derbyn adroddiad o’r negeseuon bygythiol dydd Gwener.

Ychwanegodd y llu bod y bachgen wedi cael ei arestio nos Wener a bod ymholiadau yn parhau.

Dywedodd y Prif Arolygydd Mike Llewellyn: “Hoffwn sicrhau rhieni, a’r gymuned ehangach, fod camau gweithredu cyflym wedi’u cymryd i ddiogelu disgyblion ac i ddod o hyd i’r unigolyn sydd dan amheuaeth cyn gynted ag y derbyniwyd yr adroddiad hwn.

“Efallai y byddwch yn sylwi ar bresenoldeb heddlu uwch na’r arfer yn yr ardal dros y dyddiau nesaf – bydd y rhain yno i roi mwy o sicrwydd i’r rhai sy’n byw ac yn mynychu’r ysgol yn yr ardal.”