Ydy person ag acen Gymreig yn swnio’n fwy gonest?

Mae Mercedes Durham yn credu mai rhywbeth gymharol ddiweddar yw amlygrwydd acenion Cymru tu hwnt i ffiniau’r wlad.

“Mae acen(ion) Cymru yn rhywbeth doedd pobl ddim yn arfer ei glywed tu allan i Gymru yn y gorffennol, ond gyda sioeau fel Gavin and Stacey mae pobl yn ein clywed yn fwy ac yn ei ystyried yn ddigri a chyfeillgar. Nid dim ond Gavin and Stacey sy’n gyfrifol am hyn wrth gwrs – mae hefyd llawer o ymadroddion a dywediadau Cymreig sy’n ddigri.

“Mae rhywfaint o’r ymchwil sy’n edrych ar agweddau tuag at acenion gwahanol yn awgrymu bod pobl yn gweld yr acen fawreddog neu ‘posh’ fel rhai i bobl ddeallus sydd wedi derbyn addysg dda, ond ddim yn angenrheidiol yn acen gyfeillgar.

“Ac mae acenion fel Swydd Efrog a mannau eraill o ogledd Lloegr yn cael eu gweld fel rhai mwy gonest, ac mae gan acenion Cymreig yr un cysylltiadau. Gan fod rhain yn nodweddion positif a bod pobl yn hoffi siarad gyda phobl â’r acenion yma mae’n golygu bod pobl fwy tebygol o ymddiried ynddyn nhw hefyd.”