Y Ceidwadwyr Cymreig yn addo ‘cynllun credadwy’ i ‘drwsio’ Cymru

Ar hyn o bryd, mae llywodraeth Cymru dan reolaeth Llafur, gyda rhai polau piniwn yn awgrymu y gallai Plaid Cymru a Reform wneud yn dda yn yr etholiad mis Mai nesaf.

Bydd Mr Millar yn cyfeirio at y posibilrwydd o glymblaid rhwng Llafur a Phlaid Cymru.

Mae am ddweud bod y Blaid Lafur yn cynllunio “unwaith eto” gyda Phlaid Cymru i gynnig yr un peth “ailadroddus” – “sosialaeth sy’n methu, ac sydd heb unrhyw ddaioni, y mae pobl Cymru wedi cael llond bol ohono”.

Ond y tro hwn, gydag ychydig o “genedlaetholdeb peryglus”.

“Dwi’n dweud peryglus gan mai dyna ydy eithafiaeth a chenedlaetholdeb Plaid – peryglus.

“Maen nhw eisiau rhwygo Cymru oddi wrth y Deyrnas Unedig a chodi mur o lechi ar draws ein ffin.

“Mur a allai ddod â’r hawl i fyw, gweithio, astudio a masnachu unrhyw le yn y DU i ben.”

Bydd yn mynd ymlaen i ddweud y “byddai eu cynlluniau’n costio miloedd o bunnoedd bob blwyddyn i deuluoedd cyffredin sy’n gweithio yng Nghymru”.

“Gadewch i mi fod yn glir – mae Plaid Cymru’n rhoi swyddi, pensiynau a thwf economaidd Cymru mewn perygl.”

Mae’n credu hefyd bod Reform yn “peri perygl clir a phresennol i’n diogelwch cenedlaethol”.