Safonau addysg yn cadw gweinidog ‘ar ddihun yn y nos’

Yn ôl pennaeth Ysgol y Bedol yn Garnant ger Rhydaman, Gethin Richards, mae angen edrych yn ehangach na data llythrennedd a rhifedd wrth fesur addysg.

Serch hynny, mae’n cydnabod bod safonau llythrennedd wedi dirywio dros y blynyddoedd diwethaf yn sgil y pandemig a newidiadau i gymdeithas.

Mae ‘na gylch Dechrau’n Deg ar safle’r ysgol ac mae gallu cefnogi’r plant a’u rhieni o ddwy oed yn allweddol, meddai.

Dywedodd Mr Richards: “O’n i’n darllen yn ddiweddar, mae tua chwarter o rieni bellach ddim yn siarad gyda’u plant yn rheolaidd – mae hwnna’n waith ymchwil cenedlaethol.

“Felly mae gweithio gyda rhieni yn holl, holl allweddol er mwyn adeiladu sgiliau rhieni hefyd i ddatblygu llythrennedd i blant”.

Wrth ddysgu’r disgyblion, meddai, “y ffactor fwyaf i ni yw gallu gynnal grwpiau bach ymyrraeth, grwpiau bach o gefnogaeth – ond wrth gwrs mae angen staff i wneud hynny”.

Ac mae cyllid felly’n hanfodol, meddai Mr Richards, wrth i’r plant sy’n dod i’r ysgol ddangos mwy o anghenion nag yn y gorffennol.