Llŷn: Cwt elusennol Mair yn cyrraedd carreg filltir

Wedi’i lleoli o flaen ei thŷ, mae Cwt Gobaith yn ddibynnol ar roddion, haelioni a gonestrwydd pobl leol.

Gan dderbyn nwyddau o bob math ac yna eu gwerthu ymlaen i’r gymuned, mae hi bellach wedi hel dros £20,000 i elusen Tŷ Gobaith ers 2020.

Yn ôl Mair Jones, neu Mair Gwelfor fel y caiff ei hadnabod yn lleol, mi wnaeth colli ei mam a’i brawd yn 1998 ei hysgogi i ddechrau casglu arian i achosion da.

Gan gymryd rhan mewn sawl taith gerdded, gan gynnwys y Moonwalk yn Llundain, er budd Tŷ Gobaith a Ward Alaw yn Ysbyty Gwynedd, fe wnaeth hi hefyd agor ei thŷ yn Llaniestyn ar 28 achlysur rhwng 2006 a 2019.