Honiadau yn erbyn Neil Foden ‘yn wir’, medd merch

Awgrymodd bargyfreithiwr Mr Foden, Duncan Bould, i’r ferch, sy’n cael ei adnabod yn yr achos fel Plentyn E, “nad yw’n wir” ei bod wedi cael profiadau rhywiol cyson gyda’r diffynnydd.

Gwadodd hynny, ond fe gytunodd na ddywedodd wrth unrhyw un am y peth ar y pryd.

“Doeddwn i methu,” dywedodd. “Doedd o ddim yn berthynas y byddai’n cael ei gweld yn un derbyniol.”

Dywedodd y ferch y byddai hi a Mr Foden yn trafod eu bywydau personol, a’u bod wedi mynd ar sawl drip gyda’i gilydd gan aros mewn sawl gwesty .

Awgrymodd Mr Bould, er ei bod wedi bod i rai o’r un llefydd y tu hwnt i Wynedd â Mr Foden, doedden nhw heb fynd i’r llefydd hyn gyda’i gilydd.

“Eto, mae hynny’n anghywir,” atebodd.

Dywedodd Plentyn E y byddai’n dweud wrth ei theulu ei bod rywle arall pan roedd hi’n mynd i ffwrdd gyda Mr Foden.