Galw am derfyn 20mya ar ffordd brysur yng Ngheredigion

Mae Delyth Griffiths, 71, yn byw lan y ffordd yng Nglandyfi, ble gafodd palmant ei osod fel rhan o welliannau ffordd 10 mlynedd yn ôl.

Ond fel un sy’n mynychu’r eglwys yn Eglwys-fach ac sy’n cerdded ar hyd y ffordd, mae hi’n gweld pa mor beryglus ydi’r ffordd i gerddwyr ar ôl i’r palmant ddod i stop.

“Mae’n beryglus dros ben, ac ma’ damweiniau wedi digwydd yn y gorffennol, ac ma’ damweiniau yn mynd i ddigwydd yn y dyfodol os nad yw pethau’n newid.

“Mae ‘na blant sy’n dal y bws ysgol, ac wrth gwrs, ar ôl iddyn nhw gael eu gollwng, ma’ nhw’n gorfod croesi’r rhewl, a does ‘na ddim un man diogel iddyn nhw groesi.

“Dwi’n becso bob tro taw fi fydd y statistic nesa – bod rhywun yn mynd i gael damwain andwyol yn y pen draw.”