Dyn ‘ddim yn poeni’ wrth i gi XL Bully ymosod ar ferch, 12

Doedd dyn “ddim yn poeni” wrth i’w gi XL Bully ymosod ar ferch 12 oed yn gynharach eleni, mae llys wedi clywed.

Mae Justin Allison, 37 o Lyn Ebwy, wedi pledio’n euog i gyhuddiadau o fod yn berchen ar frîd gwaharddedig, o fod yng ngofal ci oedd allan o reolaeth ac yn beryglus ac o fod â chyllell yn ei feddiant.

Clywodd llys ynadon Casnewydd fod y ci, o’r enw Rocco, wedi ymosod ar y ferch wrth iddi ddod allan o gar yn Nantyglo ym mis Hydref – gyda’r anifail yn rhedeg tuag ati “yn gyflym iawn” ac yn ei chyrraedd “mewn eiliadau”.

Dywedodd yr erlynydd Lisa Lewis fod y ci yn “chwyrnu” a bod y ferch yn “ofnus iawn”.

Clywodd y llys fod y ci wedi neidio ar gefn y ferch ac wedi dal ar ei braich wth iddi geisio gorchuddio ei phen, cyn i’w thad ymyrryd.