Dryswch wrth i Google Maps symud Aldi i bentref bach Cyffylliog

Yn ôl trigolion lleol cafodd y newid i’r feddalwedd ei wneud yn ystod yr wythnosau diwethaf, ac er bod hynny bellach wedi’i ddatrys, roedd ‘na dipyn o ddryswch.

“Dwi’m yn gwybod beth sydd ‘di digwydd ond mae pawb ‘di dilyn y sat-nav felly oedd y ceir yn mynd fyny ac mi ‘naeth lori’r un fath,” meddai Llinos Watkin Jones o’r pentref.

“Mi a’th y tryc yn styc ganol y ffordd ac mi ‘naeth o daro gwifren gynnom ni ar dŷ’r ferch, felly dwi’n disgwyl rhywun yma i drwsio hynny.

“‘Swn i’n falch ‘sa’r sat-nav ddim yn d’eud wrth bobl i ddod ffordd hyn!

“Na, does ‘na ddim Aldi ffordd hyn. Plîs peidiwch â dod… does ‘na ddim siop fawr yma!”