‘Dryswch’ dros ad-daliadau ar ôl canslo hediad Montenegro

Fe wnaeth cwmni Wonky Sheep drefnu gwesty nos Wener a nos Sadwrn i rai cefnogwyr yn sgil trafferthion gyda’r awyren.

Cafodd y cefnogwyr wybod gan y cwmni fod yr hediad wedi’i ganslo’n llwyr nos Sul.

Dywedodd un cefnogwr: “Mae’n rhwystredig achos os fysa nhw ‘di deud fod dim awyren ar y nos Wener mi fyswn i wedi mynd yn syth i fwcio un arall pan oedd y prisiau dal yn rhesymol ond yn lle hynny roedd Wonky Sheep yn gaddo a gaddo a wnaethon ni ddisgwyl – dyna’r brif broblem o safbwynt ni.

“Ni ddim yn siŵr be sy’n digwydd gyda refunds ar hyn o bryd. Mae ‘na lawer o ni dal i ddisgwyl am ein harian yn ôl ac mae ‘na ddryswch i rai sydd wedi canslo er mwyn hedfan o faes awyr arall.

“Dyma’r tro cyntaf i ni fethu gêm oherwydd trafnidiaeth. Mae’n anffodus iawn fod pobl efo tocynnau i’r gêm methu mynd – pobl sy’n gwbl selog dros ddilyn Cymru.

“Mae’n rwbath oedd pobl yn edrych ymlaen at – yn enwedig ar ôl y gêm nos Wener – ac mae’n dipyn o siom.”