‘Doedd neb yn gwrando’ – profiad merch o Wynedd o ganser gynaecolegol

Ddwy flynedd ar ôl i adroddiad pwysig gan y Senedd alw am welliannau brys mae menywod yng Nghymru yn dal i deimlo nad yw eu lleisiau’n cael eu clywed mewn gofal canser gynaecolegol.

Mae Pwyllgor Iechyd a Gofal Cymdeithasol y Senedd yn dweud bod Llywodraeth Cymru wedi methu cyflawni nifer o’u hymrwymiadau – ac mae’n nhw’n dweud bod yr ymateb wedi bod yn araf ac yn annigonol.

Un sydd wedi dioddef o ganser ar yr ofari yw Enlli Thompson o Ddyffryn Nantlle ac wrth siarad ar Dros Frecwast dywedodd bod angen mwy o addysg ar feddygon teulu.

“Am fisoedd roedden i’n mynd nôl a ‘mlaen- ‘nathon nhw ddim gyrru fi am unrhyw fath o brofion.

“Sai’n gwybod os taw fy oed i oedd e ond nath neb wrando arna i.

“Os bydden i heb ofyn am ail farn gan ddoctor fwy ‘senior’ falle bydden i ddim yma heddiw.”

Wrth ateb cwestiwn am y gwelliannau y byddai hi yn dymuno eu gweld, dywedodd: “Unwaith bues i gyda’r tim oncoleg roedd popeth yn iawn ond mae rhwbath angen newid o ran yr ochr GPs.

“Mae angen hyfforddiant a sensitifrwydd ac mae angen iddyn nhw wrando ar ferched.”

Dywed Llywodraeth Cymru eu bod croesawu adroddiad y pwyllgor ac y byddan nhw’n ymateb yn ffurfiol maes o law ond y byddan nhw’n parhau i weithio gyda’r gwasanaeth iechyd i wella perfformiad a chanlyniadau canser.