Dim ymchwiliad cyhoeddus i Barc Cenedlaethol Glyndŵr am y tro

Ni fydd y llywodraeth yn bwrw ymlaen ag ymchwiliad cyhoeddus i Barc Cenedlaethol Glyndŵr am y tro.

Dywedodd y gweinidog cabinet dros effeithiolrwydd llywodraeth a’r cyfansoddiad, Dafydd Trystan Davies, ei fod yn “gwyro o blaid peidio â chynnal ymchwiliad lleol cyhoeddus”.

Bydd peidio â bwrw ymlaen ag ymchwiliad lleol cyhoeddus yn golygu nad oes Parc Cenedlaethol newydd wedi’i sefydlu ar hyn o bryd.

Cyn gwneud penderfyniad terfynol, mae Dafydd Trystan Davies yn “bwriadu rhoi cyfle byr i bawb sydd â diddordeb yn y cynnig hwn wneud sylwadau pellach am fy nghasgliad dros dro”.

Mae’r llywodraeth nawr yn gwahodd sylwadau pellach dros y pedair wythnos nesaf, cyn penderfyniad terfynol.

Mae polisi dros barciau cenedlaethol yn gyfrifoldeb i’r gweinidog dros wydnwch gwledig, Llŷr Gruffydd, ond fe anogodd ef bobl i wrthwynebu cynllun Glyndŵr cyn i Blaid Cymru ddod i rym, felly trosglwyddwyd y penderfyniad i’r gweinidog dros effeithiolrwydd llywodraeth a’r cyfansoddiad

Dywedodd Dafydd Trystan Davies, gan gyfeirio at y pum awdurdod lleol yn ardal y Parc Cenedlaethol arfaethedig, “fy marn dros dro yw bod gwerth mewn parhau i gadw ffocws cryf ar alluogi’r dynodiadau a’r partneriaethau presennol hynny i gyflawni ar gyfer natur, hinsawdd, treftadaeth ddiwylliannol, hamdden a chymunedau lleol, tra’n parhau i fynd ar drywydd yr amcanion a nodwyd drwy broses ddynodi Glyndŵr drwy fecanweithiau eraill.”

“Er enghraifft, rydym yn cymryd camau ymarferol i adfer natur ac adeiladu gwytnwch hinsawdd ar draws y gogledd-ddwyrain.

“Drwy raglen genedlaethol mawndir Llywodraeth Cymru, cyflawnwyd gwaith adfer sylweddol o fewn tirwedd genedlaethol Bryniau Clwyd a Dyffryn Dyfrdwy, gan gynnwys safle rhostir Llandegla sydd o ddiddordeb gwyddonol arbennig, gan ddod â thua 120 hectar o fawndir i gyflwr mwy ffafriol ac adferol dros y pedair blynedd diwethaf.”