Deuddydd o eira a rhew i ddod wrth i’r tymheredd ostwng

Mae disgwyl i gawodydd gaeafol ledu tua’r de, gan gyrraedd mannau mewndirol yn sgil y gwyntoedd o’r gogledd.

Ym mannau’r cawodydd mwyaf cyson mae disgwyl 2-5cm o eira ac hyd at 10cm mewn ambell fan yn enwedig ar fryniau dros 200m o uchder yn Sir Benfro a gorllewin Sir Gâr.

Mae yna berygl o rew pe bai eira’n dadmer yn rhannol ac yna’n ailrewi dros nos.

Fe allai’r amodau achosi problemau gan gynnwys ffyrdd, llwybrau a phalmentydd llithrig, trafferthion i yrwyr a theithwyr a thoriadau trydan a all effeithio ar ddefnyddio ffonau.

Fe ddaw’r tywydd oer ddiwrnodau wedi i Storm Claudia achosi llifogydd yn rhannau o Gymru, gyda’r difrod gwaethaf yn ardal Trefynwy, a welodd fis o law mewn cyfnod byr.