Derbyn grant i ddychwelyd i Gymru ar ôl degawd yng Ngwlad Thai

Cafodd Annest ei magu yn Nhrefor, Gwynedd ac mae hi’n ysu i’w mab gael yr un profiadau â gafodd hi, meddai.

“Dwi wedi cael cyfleoedd da iawn yn yng Nghymru, wedyn dwi isio fo gael yr un profiad, cael profiad o ddiwylliant Cymru. Cael gweld lle mae ei wreiddiau o, ‘de?”

Ond mae mwy na dim ond addysg a diwylliant yn ei denu hi’n ôl i Gymru, sef ei theulu.

“Mae fy rhieni yn methu Arwyn. Dw i ‘di bod yma ddeg mlynedd, a dw i’n meddwl mai rhyw bump gwaith maen nhw wedi bod i ‘ngweld i, a mae nhw wedi dod i’w weld o ryw ddwy dair gwaith mewn dim ond blwyddyn! Maen nhw wir isio bod yn rhan o’i fywyd o.”

“Mae ‘mrodyr a chwiorydd yn dechra’ teulu eu hunain rŵan hefyd, wedyn dwi isio bod yna i gefnogi nhw yn enwedig achos babis cynta’ ydyn nhw.”