Degau o ysgolion ar gau a miloedd dal heb ddŵr wedi i bibell fyrstio

Mae degau o ysgolion ar draws Sir Conwy ar gau ddydd Gwener, a miloedd o bobl dal heb ddŵr ers i bibell fyrstio.

Mae Dŵr Cymru wedi awgrymu y gallai hyd at 40,000 o gartrefi fod heb gyflenwadau ers i’r bibell fyrstio yn safle trin dŵr Bryn Cowlyd, Dolgarrog brynhawn Mercher.

Roedden nhw wedi cadarnhau bod 8,000 o gartrefi wedi colli cyflenwad nos Fercher, a bod hyd at 33,000 o gartrefi mewn perygl o golli eu cyflenwadau ddydd Iau.

Yn eu datganiad diweddaraf brynhawn Iau, dywedodd Dŵr Cymru bod trwsio’r bibell “yn cymryd mwy o amser nag a gynlluniwyd” ac y gallai’r cyflenwad dŵr fod i ffwrdd am hyd at 48 awr.

Maen nhw’n darparu dŵr potel i bobl yn y cyfamser ac yn blaenoriaethu “cefnogi 5,000 o gwsmeriaid bregus”, gan drefnu cyflenwadau o lefydd mor bell i ffwrdd â’r Alban.

Am 08:00 fore Gwener roedd 39 o ysgolion a chanolfannau addysg yn Sir Conwy, dolen allanol wedi dweud na fyddan nhw ar agor, ac mae rhai ysbytai hefyd wedi eu heffeithio.