Cymru’n ‘barod’ i synnu pawb yn Euro 2025

Tra bod yr hyder yn uchel yng ngharfan Cymru, mae pethau’n dra gwahanol o safbwynt Yr Iseldiroedd.

Mi fydd eu rheolwr Andries Jonker yn gadael ei swydd wedi’r bencampwriaeth – ond mae’n ymddangos nad yw’n hapus gyda’r penderfyniad yna.

Mae Jonker wedi bod yn siarad â bodlediad, gan ddweud ei fod wedi synnu gyda phenderfyniad Cymdeithas Bêl-droed Yr Iseldiroedd i beidio â rhoi cytundeb newydd iddo.

Ac yn ei gynhadledd newyddion cyn y gêm yn erbyn Cymru fe gafodd ei gyhuddo gan un newyddiadurwr o drin ei chwaraewyr fel “pypedau.”

Mae’r holl beth wedi achosi tensiwn o fewn y garfan, gyda’r chwaraewr canol cae profiadol Sherida Spitse yn dweud na ddylai Jonker fod wedi ei ddyfodol yn gyhoeddus.

Yn ogystal â hynny mae’r Iseldiroedd wedi cael canlyniadau siomedig yn ddiweddar, gan golli 4-0 yn erbyn Yr Almaen, a chael gêm gyfartal 1-1 yn erbyn Yr Alban – gyda’r Alban dim ond chwe safle yn uwch na Chymru ar restr detholion FIFA.