Chwilio am yrrwr wedi i ddyn farw yn dilyn gwrthdrawiad yn Sir Gâr

Mae Heddlu Dyfed-Powys yn apelio am gymorth i ddod o hyd i yrrwr wedi i ddyn farw mewn gwrthdrawiad â char yn Sir Gaerfyrddin.

Digwyddodd y gwrthdrawiad ger Capel y Bedyddwyr Caer Salem ym mhentref Llanpumsaint rhwng 18:45 a 19:45 nos Lun, tra bod y dyn yn mynd â’i gi am dro.

Bu farw’r dyn o’i anafiadau ac mae ei deulu bellach yn derbyn cymorth gan swyddogion arbenigol.

Dywed yr Heddlu fod y car wedi gadael safle’r digwyddiad ac maen nhw bellach yn ceisio dod o hyd i’r gyrrwr.

Mae’r llu yn apelio am unrhyw wybodaeth ynghylch y digwyddiad, ac yn awyddus iawn i siarad â’r dyn oedd yn gyrru’r cerbyd glas oedd â difrod amlwg iddo.

Mae’r lôn ar gau ar hyn o bryd ac yn debygol o fod ar gau am ychydig o amser wrth i’r ymchwiliad barhau.