Caryl Parry Jones yn cofio yr ‘arallfydol’ Dewi Pws

Mae Caryl Parry Jones wedi rhoi teyrnged i Dewi ‘Pws’ Morris, ei ffrind “chwedlonol” am hanner can mlynedd.

Daeth cadarnhad fore Iau fod y diddanwr, actor, cerddor, cyflwynydd a’r tynnwr coes wedi marw yn 76 oed ar ôl cyfnod o salwch byr.

Mae ei ffrind a’i gydweithiwr am 50 mlynedd, Caryl Parry Jones, wedi rhannu ei hatgofion o’r dyn oedd yn “ffrind i bawb”.

Yn siarad ar raglen Dros Frecwast, dywedodd Caryl ei bod yn “hollol starstruck” pan welodd hi Dewi am y tro cyntaf yn 12 neu 13 oed yn perfformio gyda’r Tebot Piws.

Roedd y band yn “ffrwydro ar y llwyfan a’n gwneud y pethau gwirion ‘ma – props a just stopio cân ar ei hanner… pan weles i o am y tro cyntaf oedd o’ n ormod i fi, o’n i methu siarad,” meddai.