Caerdydd yn cwympo o’r Bencampwriaeth

Mae Caerdydd wedi cael eu diarddel o’r Bencampwriaeth ar ôl gêm di-sgôr yn erbyn West Bromwich Albion dydd Sadwrn.

Wrth fynd i mewn i’r penwythnos, roedd angen buddugoliaeth a thipyn o lwc ar yr Adar Gleision i osgoi cwympo o’r gynghrair.

Ond roedd y gêm gyfartal a buddugoliaeth Luton Town yn ddigon i sicrhau y bydd tîm Aaron Ramsey yn cystadlu yn Adran Un y tymor nesaf.

Mae’n newid byd i glwb y brifddinas, oedd yn chwarae yn yr Uwch Gynghrair yn 2018, ond sydd wedi profi sawl tymor anodd ers hynny.

Dim ond naw gêm y mae Caerdydd wedi eu hennill y tymor yma, y nifer isaf yn y Bencampwriaeth.

Fe gafodd cyn-reolwr Caerdydd, Omer Riza, ei ddiswyddo ar 19 Ebrill, ac Aaron Ramsey fydd wrth y llyw ar gyfer y gemau olaf.

Ramsey yw’r 16eg rheolwr yn ystod 15 mlynedd Vincent Tan yn berchennog ar y clwb, ac roedd y protestio yn ei erbyn y tu allan i Stadiwm Dinas Caerdydd yr wythnos diwethaf yn arwydd clir o deimladau rhai cefnogwyr.

Ar y pegwn arall, mae Wrecsam yn gobeithio creu hanes drwy ennill dyrchafiad am dri thymor yn olynol wrth esgyn i’r Bencampwriaeth o Adran Un.

Mi fydd Caerdydd yn chwarae nesaf yn erbyn Norwich ar ddydd Sadwrn, 3 Mai – eu gêm olaf o’r tymor.