Bwriad ail-agor capel gyda chysylltiad â Phatagonia

Cafodd Lewis Jones ei eni yng Nghaernarfon, ac roedd yn flaenllaw yn hanes sefydlu’r wladfa Gymreig ym Mhatagonia.

Roedd yn mynychu capel Engedi yng Nghaernarfon ac yn argraffydd yng Nghaergybi. Pan aeth i Batagonia, sefydlodd wasg argraffu yno hefyd.

Aeth i Batagonia ym 1862, a dychwelodd i Gymru er mwyn perswadio’r Cymry i fentro yno.

Mae Luned Gonzalez yn ffigwr adnabyddus ym Mhatagonia, ac yn or-wyres i ddau o brif sefydlwyr y Wladfa – Lewis Jones a Michael D. Jones.

Dywedodd: “Mi oedd Lewis Jones yn argraffydd ac yn mynychu capel Engedi… ac mi oedden nhw’n cael cyfarfodydd i drafod gwahanol bethau, ac un o’r trafodaethau buodd, oedd sefydlu gwladfa ym Mhatagonia mae’n debyg.

“Mae Trelew wedi cael ei henwi ar ôl Lewis Jones, achos bod o wedi bod yn bwysig i gael yr elw i ddod o Fadryn… i’r dyffryn, ac o’r herwydd, mi oedd yna dref wedi cael ei geni.”