Aros blynyddoedd am gartref ‘yn cael effaith ar fy iechyd meddwl’

Casnewydd, y ddinas sy’n tyfu gyflymaf yng Nghymru, sydd â’r gyfradd ddigartrefedd uchaf yn y wlad.

Mae wedi codi dros 50% dros y flwyddyn ddiwethaf. Mae 1,359 o aelwydydd yn ddigartref yno – y ffigwr uchaf erioed.

Does dim rhyfedd felly bod sesiwn galw draw y gwasanaeth tai yn llyfrgell ganolog Casnewydd yn un prysur.

Yn ôl y swyddog cyngor ac atal, Hannah Berry, mae pobl yn gallu “bod yn grac, ypset, rhwystredig”.

“Dim ond cartref ma’ nhw ishe,” meddai.

Rhan anoddaf ei swydd yw methu helpu pobl, ychwanegodd.

“Ry’n ni’n trio’n gorau glas i helpu pawb, ond ry’n ni’n cael ein cyfyngu gan gyllid, prinder tai, diffyg darpariaeth a phrinder gwasanaethau eraill,” meddai.