Arestio dyn lleol yn dilyn marwolaeth ym Mhwllheli

Mae’r heddlu yn ymchwilio i farwolaeth dyn ym Mhwllheli.

Dywedodd Heddlu’r Gogledd mewn datganiad fod y dyn – oedd yn lleol i’r ardal – wedi marw brynhawn Sadwrn, 9 Tachwedd.

Mae teulu’r dyn yn cael eu cefnogi gan swyddogion arbenigol.

Mae dyn lleol arall wedi cael ei arestio mewn cysylltiad â’r digwyddiad ac mae’n parhau yn y ddalfa.

Yn ôl y llu, fe fydd yna bresenoldeb sylweddol gan yr heddlu yn yr ardal wrth i ymholiadau gael eu cynnal.

Mae’r heddlu yn pwysleisio nad oes unrhyw fygythiad pellach i’r gymuned, ac maen nhw wedi diolch i drigolion lleol am eu hamynedd a’u cydweithrediad.

Maen nhw hefyd yn galw ar unrhyw un sydd â gwybodaeth all fod o ddefnydd i’r ymchwiliad i gysylltu â nhw.