Araith y Brenin: Beth sy’n debygol o effeithio ar Gymru?

Ond does dim arwydd y bydd Llafur yn codi’r rheol sy’n cyfyngu budd-daliadau i’r ddau blentyn cyntaf yn unig – er gwaetha’r galwadau o du mewn a thu allan i’r blaid.

Yn ôl Plaid Cymru, mae’r rheol sy’n atal rhieni rhag hawlio credyd cynhwysol neu gredyd treth am drydydd plentyn yn effeithio ar 11% o blant Cymru – 65,000 o blant.

Dylai Syr Keir ddefnyddio araith y Brenin i “ddod â’r cyfyngiad dau blentyn creulon yma i ben,” medd llefarydd Gwaith a Phensiynau Plaid Cymru.

Mae Plaid Cymru yn cefnogi gwelliant gan yr SNP i araith y Brenin i newid y polisi.

Ond mae mwyafrif enfawr Llafur yn San Steffan bellach yn golygu ei bod hi’n anhebygol y bydd unrhyw fygythiad iddyn nhw golli’r bleidlais ar araith y Brenin – er bod rhai aelodau seneddol Llafur yn Lloegr hefyd yn galw am newid.

Mae Keir Starmer wedi dweud ei fod yn deall y dadleuon dros newid y polisi ond bod hynny’n rhy ddrud ar hyn o bryd.

Cafodd y polisi ei gyflwyno gan y Ceidwadwyr yn 2017, a sefydliad y Resolution Foundation yn dweud y byddai cael gwared arni’n costio rhwng £2.5bn a £2.6bn.