Anturiaethau Bluey nawr ar gael yn y Gymraeg

Mae Hanna Hopwood ei hun yn cyfaddef iddi fwynhau darllen llyfrau Bluey i’w phlant ei hun a bod y profiad o addasu’r llyfr wedi bod yn un “arbennig” iddi.

“Mae pob un o benodau a llyfrau’r gyfres wedi dod â boddhad mawr i ni fel teulu – gydag Iwan (ei gŵr) a minnau’n mwynhau cymaint (os nad fwy, weithiau!) â’r plant!”

Yn aml mae negeseuon am deulu a chyfeillgarwch yn treiddio drwy straeon Bluey ac roedd hynny’n elfen bwysig arall pam y gwnaeth Hanna benderfynu addasu Bluey i’r Gymraeg.

“Mae’n ein dysgu, ein hatgoffa a’n cymell i ystyried beth sy’n bwysig i ni mewn ffordd mor hyfryd, hwyliog a hapus.”

Yn yr addasiad o Nos Da Ystlum Ffrwythau, mae Blŵi yn dychmygu ei hun fel ystlum ffrwythau, yn esgyn drwy awyr y nos ar antur freuddwydiol fythgofiadwy.

Bwriad Hanna gyda’r addasiad, meddai, yw i “greu rhywbeth sy’n teimlo’n gysurus a chartrefol i ddarllenwyr bach Cymru.”