Aberystwyth: Codi pont dros dir ysgol gynradd yn ‘annealladwy’

Yn ôl Hannah Lee, sy’n aelod o Gymdeithas Rhieni ac Athrawon yr ysgol, mae’r safle ar hyn o bryd yn edrych “mor hardd, a chymaint yn mynd ymlaen yno”.

“Yn y sesiynau ysgol goedwig, ar ôl ysgol ac fel rhan o’r cwricwlwm, mae blwyddyn 6 wedi bod yn tyfu llysiau yn gysylltiedig â chyfnod yr Ail Ryfel Byd fel rhan o’u dysgu, ac mae eglwys leol yn defnyddio’r safle yn fisol ar gyfer eu gwaith.”

“Mae’n amhosib dychmygu hynny yn goroesi o dan yr hyn fyddai’n bont o faint sylweddol.”

Dywedodd bod gan bawb “bryderon sylweddol”, gan gynnwys ei thri o blant.

“Fe wnes i fynd â fy mhlant i weld y cynlluniau, ac roedd fy merch (Lydia, 7 oed) yn ei dagrau, ac yn dweud ‘allwch chi ddim gwneud hynny i fy ardal chwarae a’r coed rwy’n eu dringo’.”