A fydd Cymru’n cyrraedd Cwpan y Byd 2026?

Beth felly am farn y cefnogwyr? Pa mor hyderus ydy rhai o aelodau’r Wal Goch y bydd Cymru yn cyrraedd y rowndiau terfynol?

“Gobeithio ein bod ni’n gallu cymryd momentwm o’r gêm ddiwethaf yn ennill o 7-1 yn erbyn Gogledd Macedonia,” meddai Gwenllian Evans o Gaerdydd.

“Mae’n bwysig cofio mi oedden ni heb Kieffer Moore adeg hynny, felly mae’n gyfle eto i chwaraewyr eraill gyfrannu gyda goliau.

“Ni’n gwybod sut mae Bellamy mo’yn chwarae. Mae e ishe bod yn ymosodol gyda lot o gyflymder yn y tîm. Mae digon o dalent gyda ni a digon o chwaraewyr cyffrous i gael canlyniadau da.”

Er fod Kevin Williams o Gaernarfon hefyd yn ffyddiog, tydi o ddim yn cymryd dim byd yn ganiataol.

“Dwi’n ofnadwy o nerfus am y gêm yn erbyn Bosnia, ond eto’n ddistaw bach dwi’n hyderus. Does bosibl fod y canlyniad yn erbyn Gogledd Macedonia wedi codi’r hyder o fewn y garfan,” meddai.

“Ond mae pêl-droed y dyddiau hyn wedi ein dysgu ni i beidio cymryd dim byd yn ganiataol. Mae’n bwysig cofio mai gemau one-off ydi’r rhain, ac mae’r pedwar tîm sy’n yr un llwybr yn ddigon da i fynd i Gwpan y Byd.”