O ffoi’r rhyfel yn Wcráin i astudio technoleg gofod yn 16 oed

Mae Kateryna yn fyfyriwr “eithriadol”, medd Dr Gregory Burwell – uwch-ddarlithydd yn adran ffiseg Prifysgol Abertawe.

“Dyma’r cyfnod preswyl cyntaf o’r fath yn CISM, ac mae ei llwyddiant wedi gosod meincnod uchel ar gyfer rhaglenni’r dyfodol,” dywedodd.

Cyfeiriodd at ei gwaith ar ffotofoltäig yn y gofod, lle mae ffotogelloedd yn troi golau haul yn drydan yn uniongyrchol.

Mae’r tywydd a chylch dydd a nos y Ddaear yn cyfyngu ar baneli ffotofoltaidd neu solar ar y tir ond mae paneli gofod yn wynebu’r haul ac yn gallu dal ynni solar 24 awr y dydd.

Byddai’r ynni sy’n dod o’r haul yn cael ei anelu i’r ddaear ble mae’n cael ei droi’n drydan.

Dywed Dr Burwell fod paneli solar ar doeau wedi eu gwneud o silicon “nad sy’n ddelfrydol yn y gofod oherwydd mae’n rhy drwm i amsugno digon o oleuni”.

Y nod felly yw “datblygu ffotofoltäig haen denau i greu mwy o bŵer gyda llai o bwysau, sy’n bwysig wrth anfon lloerennau i’r gofod”.

Ychwanegodd: “Mae gorchestion Kateryna’n dangos effaith rhoi adnoddau blaengar a mentora i fyfyrwyr talentog.”