Arestio dyn wedi ymosodiad yn Y Rhyl

Mae dyn o ardal Y Rhyl wedi cael ei arestio wedi i ddyn gael anafiadau difrifol ar Stryd Sussex yn y dre yn gynnar fore Sadwrn.

Fe ddigwyddodd yr ymosodiad y tu allan i The Tiki Room am oddeutu 03:10.

Mae’r dyn sydd wedi’i anafu wedi’i drosglwyddo i Ysbyty Stoke ac ar hyn o bryd mewn cyflwr difrifol.

Mae dyn wedi ei arestio ar amheuaeth o anafu ac mae’n parhau yn y ddalfa.

Mae’r Uwch Swyddog Ymchwilio, y Ditectif Uwcharolygydd Rebecca Hughes yn apelio ar unrhyw un a welodd y digwyddiad i gysylltu â’r heddlu.

“Roedd nifer o bobl yn cymdeithasu yn y Tiki Room, a thu allan gerllaw, adeg y digwyddiad fore Sadwrn,” meddai.

“Rwy’n awyddus i siarad ag unrhyw un a welodd unrhyw beth, neu unrhyw un sydd â gwybodaeth, ac yn gofyn iddyn nhw gysylltu â swyddogion cyn gynted â phosibl.

“Hoffwn hefyd dawelu meddwl y cyhoedd gan ei bod hi’n ymddangos bod hwn yn ddigwyddiad ynysig.”