Newidiadau i’r cynllun ffermio dadleuol o blannu coed

Mae Rhys Evans yn gobeithio y bydd y rheol o ofyn i ffermydd gadw o leia 10% o’u tir fel cynefin i fywyd gwyllt yn dal yn rhan o’r cynllun – yn un peth er mwyn gwneud busnesau’n fwy cynhyrchiol.

“Nid cynllun ‘fence and forget’ yw hyn – ond integreiddio cynefinoedd o fewn y system fwyd, ac mae digon o dystiolaeth yno gall hyn wella cynhyrchiant a effeithiolrwydd ar y fferm,” meddai.

Ond o ran y rheol 10% o goed ar y tir, mae’n dweud bod angen mwy o hyblygrwydd.

“Y risg o gael targed sy’n orfodol i bawb, sydd wedi’i yrru gan un prif bwrpas sef newid hinsawdd, yw bod ni’n plannu’r goeden anghywir yn y lle anghywir, ac mae hynny’n gallu cael sgil effeithiau negyddol ar fioamrywiaeth ac efallai effeithiau andwyol ar dyfu bwyd.”

Mae undebau amaeth wedi galw am gael gwared ar y rheol honno, gan ddweud ei bod hi’n “anymarferol”.

Ond mae rhai sy’n gefnogol – fel Coed Cadw – yn nodi bod lefel y coed ar gyfartaledd ar ffermydd Cymru eisoes yn cyrraedd rhwng 6 a 7%. Ar sail hynny, mae’n nhw’n credu bod y rheol yn gais “gweddol resymol”.