‘Bydd newid polisi cludiant ysgol yn peryglu plant bregus’

Mae Sam, 34, sy’n fam sengl i ddau o blant, ymhlith y rhieni a fydd yn cael eu heffeithio gan y newidiadau.

Mae gan ei mab 12 oed, Owen, epilepsi ac anhwylderau niwrolegol eraill.

Dywedodd y byddai’n cymryd dwy awr i Owen gerdded o’u cartref i Ysgol Gyfun Aberpennar.

“Rwy’n byw ar fynydd – dyw’r daith i’r ysgol ddim yn ddiogel,” meddai. “Hoffwn pe bai’r person sy’n cynllunio’r polisi hyn yn dod i gerdded gydag Owen i’r ysgol.

“Does dim croesfannau, mae’n dywyll, mae’r palmentydd yn gul neu mewn mannau does dim rhai o gwbl, a does dim trafnidiaeth gyhoeddus yn lle rydyn ni.

“Mae’n bryder mawr.”

Ychwanegodd: “Byddai’n rhaid iddo adael am yr ysgol am 06:30. Mae Owen yn meddwl y byddai’n cymryd dwy awr iddo gyrraedd yr ysgol.”