Erthylu: Gwasanaeth llawfeddygol Cymru ‘yw’r gwaethaf yn y DU’

Mae cynllun iechyd cyntaf menywod Cymru, a gafodd ei gyhoeddi fis Rhagfyr 2024, yn nodi y dylai erthyliad fod ar gael “yn lleol a heb oedi i bob menyw” i leihau “cymhlethdodau, gofid a chost”.

Mae ariannu a darparu gwasanaethau ar gyfer gofal erthylu yn ystod mis 3-6 beichiogrwydd yn cael ei weld fel nod hirdymor i’w gyflawni mewn tua chwech i 10 mlynedd.

Mae’r Aelod Senedd, Sioned Williams, wedi codi’r mater yn y Siambr gan ddweud bod y grŵp trawsbleidiol iechyd menywod wedi bod yn gofyn i Lywodraeth Cymru weithredu ers 2018.

“Mae gyda ni gynllun newydd sy’n dweud bod hyn yn hawl ac ry’n ni’n gwybod, y realiti yw, nad dyna’r achos,” meddai AS Plaid Cymru dros Orllewin De Cymru.

“Mae’r gallu gyda ni yma yng Nghymru i gael y math yma o driniaeth, felly does dim esgusodion mewn gwirionedd.”