Gofal cymdeithasol: Antur Waunfawr yn dangos yr hyn sy’n bosib

Wrth gynnig cefnogaeth i’r staff, mae’r Antur hefyd yn helpu gweithwyr i ennill sgiliau all arwain at ddatblygu gyrfa a chyflogau gwell.

Un sydd wedi elwa o’r cyfleoedd hyfforddi yw Kim Roberts, sy’n weithiwr cefnogol.

“Mae’r Antur wedi rhoi fi trwy NVQ Lefel 2 Health and Social Care, so dwi wedi ‘neud hwnna’n 2019 ar ôl dechrau’r job.

“A dwi wrthi yn ‘neud application rŵan i ‘neud NVQ Lefel 3 – rŵan bo fi’n uwch weithwraig alla i ‘neud hwnna.

“Mae’r bobl yma wedi helpu fi i ddatblygu fy hun efo hyfforddiant a dringo’r ysgol yn y gwaith.”

Mae’r galw am gefnogaeth i unigolion sydd ag anghenion gofal yn cynyddu, ac mae ymateb i hynny yn heriol.

Fe allai gwersi sydd wedi eu dysgu mewn canolfannau fel Antur Waunfawr dros y 40 mlynedd ddiwetha’ helpu gwasanaethau ar draws Cymru, sydd eisoes dan bwysau, i geisio cwrdd â’r galw.