‘Ges i fy nyrnu yn fy wyneb am yrru 20mya’

Dywedodd Mr Lavis ei fod newydd adael ei gartref ym Mrynmenyn ac yn gyrru i’r ysbyty am sgan pelydr-X o’i galon tua 08:30 pan ddechreuodd fan yrru’n agos y tu ôl iddo.

“Roedd yn fflachio ei oleuadau ac yn canu ei gorn, oherwydd ‘mod i’n gwneud 20mya,” meddai.

Dywedodd y cyn-beiriannydd awyrennau, sydd bellach wedi ymddeol, bod y fan yn dal y tu ôl iddo pan stopiodd mewn cyffordd ger tafarn y Fox and Hounds yn y pentref.

Ar yr adeg yma daeth y gyrrwr, Shaw, allan o’i gerbyd.

“Mae’n dod at fy nrws, yn agor fy nrws, ac ar ôl llawer o weiddi a rhegi, yn fy nyrnu,” meddai Mr Lavis.

“Un dyrnod yn fy wyneb, ac yna trodd o gwmpas ac aeth yn ôl i’w fan.

“Roedd gen i waed yn llifo i lawr fy wyneb ac fe adawodd.

“Doedd dim edifeirwch, dim gweld sut oeddwn i na dim byd, ac yna es i ymlaen i’r ysbyty.”