Galw am fwy o ddiogelwch yn y Sioe Fawr wedi lladradau beiciau cwad

Mae Will Ellis yn gyfarwyddwr ar gwmni D G Thomas Agri Ltd o Lanbed, ac wedi bod â stondin yn y Sioe Frenhinol ers blynyddoedd.

Ond nid yw wedi cael y dechrau gorau i’w wythnos wedi i un o’i feiciau cwad gael ei ddwyn oddi ar y maes.

Dywedodd iddo gyrraedd nos Wener i osod y stondin, ond fore Sul fe gafodd alwad ffôn gan Heddlu Dyfed-Powys yn dweud bod un o’i feiciau cwad wedi cael ei ddwyn.

Yn ffodus iddo, mae beiciau’r cwmni yn cynnwys ‘tracker‘, ac felly roedd modd dod o hyd i’r beic yn sydyn.

“Ro’n i’n gwybod bod ‘na tracker ar y beic, so galwad ffôn yn syth i’r cwmni tracker, a chware teg iddyn nhw, ‘naethon nhw siarad yn syth gyda Heddlu Dyfed-Powys ac anfon gwybodaeth y live tracker iddyn nhw.

“O fewn awr a hanner roedden nhw wedi ffeindio’r beic ac roedd ar y ffordd ‘nôl i’r sioe.”