Fferyllfeydd cymunedol yn wynebu’r cyfnod ‘anoddaf erioed’

Mark Griffiths yw cadeirydd Fferylliaeth Gymunedol Cymru, ac mae wedi gweithio yn y diwydiant ers dros 40 mlynedd.

Mae’n credu mai dyma’r cyfnod “anoddaf erioed i fferyllfeydd”.

“Ry’m ni wedi gweld cyflogau staff yn codi’n gyflym, costau cyffredinol fel biliau ynni yn codi a galw i ddarparu gwasanaethau ychwanegol, ond yn anffodus dydyn ni ddim wedi gweld y cyllid sydd ar gael yn cyfateb â hynny oll,” meddai.

Dywedodd bod llawer o fferyllfeydd wedi dweud eu bod wedi gorfod edrych ar lefelau staffio neu gwtogi ar eu horiau agor i arbed arian.

“Yn syml, mae hon yn sefyllfa anghynaladwy,” meddai.

“Rydyn ni’n gwneud y gorau gallwn ni, ond dwi’n credu y gallen ni wneud yn well os ydyn ni’n cael ein hariannu i’r lefel cywir.”