‘Amhosib’ rhedeg fferyllfa oherwydd y costau cynyddol

Mae fferyllydd arall o Geinewydd yng Ngheredigion yn dweud ei fod wedi derbyn llythyrau bygythiol gan gwmnïau benthyciadau ar ôl mynd i ddyled o £145,000 wrth geisio cadw ei fusnes ar agor.

Mae sefyllfa ariannol Tunde Olawoye, 54, wedi gwaethygu’n sylweddol yn ystod y blynyddoedd diwethaf, ac mae’n “teimlo’n ofnus bob mis” wrth feddwl am sut y bydd yn fforddio talu ei staff.

Dywedodd Mr Olawoye fod y busnes yn gwneud yn “iawn” i ddechrau, ond sylweddolodd yn fuan fod ei gostau cyffredinol yn fwy na’i dâl.

Dywedodd fod y cynnydd diwethaf o 4% i’r CPFC yn “swnio fel cymaint”, ond “nad yw’n gwneud llawer o wahaniaeth mewn gwirionedd”.

“Dyw e ddim yn gynaliadwy o gwbl,” meddai.

“Mae angen iddyn nhw fuddsoddi mwy yn y proffesiwn oherwydd ni yw rheng flaen y maes iechyd yn y wlad yma.”